Kung tatanungin ako ng “Kumusta ka?” ang isasagot ko ay, “Heto, handa nang anihin ang bini sa kalooban ko.”

Mas ang salita. Puwede rin naman ang girl group para mapaindak at mapasayá táyo kahit papaano. Pero ang salitang bini mismo ay nangangahulugang tahimik at mahinahon. Sa panahong itong punông-punô ng alinlangan at namumuong inis, kailangan nating taglayin ang hinahon. Babalikan ko mamaya kung bakit kailangan din ng katahimikan. 

Dahil habang sumasaksi táyo sa mga madrama at maaksiyong palabas sa ating Senado, ang pagiging mabini (na taglay ang hinahon) ang magbibigay sa atin ng kakayahan na timbangin at kilatisin ang mga bagay-bagay. 

Hindi ka magiging padalos-dalos sa kilos mo. Kasama rin naman sa pagiging mabini ang pag-unawa kung bakit ganoon ang ikinikilos ng mga tao. Mauunawaan mo ang kanilang mga tunay na intensiyon at ang mga plano ng mga táong sinusunod nila. Kapag naka-on ang mabini mode (with hinahon feature) mo, mahuhúli mo ang pagsisinungaling sa wika at micro gestures ng senador (mula sa actor-turned-politician diehard, nepolitikos, mga may alegasyon ng korupsiyon, o all of the above) at sa sinumang paboritong kinaiinisang politiko. 

May isa pang kaugnay na kasabihan sa matandang bokabularyo: pakahinhinin mo ang loob mo, maging tahimik at mahinahon sa kilos mo. Hindi dapat tingnan na kahinaan ang pagiging mahinhin. Hindi ka bubuwelta agad-agad at gagawa ng kung ano-ano dahil hindi pa napag-iisipang mabuti ang mga bagay-bagay. Napakadali na talagang gawin nito, lalo na ang magsalita, sa panahon na ipagagawa na lang ng iba sa AI ang kanilang mga mensahe ng pagbatikos. 

Kayâ kailangan ang katahimikan. Nagsisilbing moog o fortification sa loob ng ating sarili ang katahimikan. Lugar natin ito para magsuri at tanggapin ang ating mga nararamdaman. Maaari táyong magplano at tingnan ang mga scenario. Binibigyan táyo ng katahimikan ng panahon para ihanda ang ating mga sarili para sa susunod na hakbang. Kailangan lang din nating mag-ingat dahil kapag nasobrahan sa paglalagi rito, ang moog ng katahimikan ay nagiging estruktura rin para sa komplisidad. Nanahimik ka lang at walang ibang ginawa. Ibig sabihin, pumayag ka rin sa iyong pinag-iisipang batikusin. 

Pero narito ang pinakakapangyarihan ng hinahon. Isang kahulugan rin nito ang pagbabago sa mali mula muli sa matandang bokabularyo natin. May kaakibat na responsabilidad ang paghinahon sa pagwawasto ng kamalian unang-una muna sa sarili. May kasabihan pa ngang maghinahon ka o baguhin ang iyong sarili. Ibig sabihin ang sinumang may maling nagawa, maaari pa ring bawiin ang kaniyang dangal sa pamamagitan ng pagtatama sa sarili. 

Pero maaari rin naman itong gawin para baguhin ang mali sa paligid. Gawing kolektibo ang pagiging mahinahon at ano ang makukuha natin? Naipong pananahimik na susundan ng kolektibong kilos na may linaw at gaan. Samahan mo na rin ng gálit na kayang maglinis ng kalooban tungo sa wastong pagkilos.

MABABASA AT MAPAPANOOD DIN SA RAPPLER

• Marcos: What happened to the Senate?
• Majority senators boycott sessions to keep grip on blue ribbon panel, other committees
• Cayetano’s repeated refusal to convene Senate raises constitutional issue
• [Rear View] In his word war with Erwin Tulfo, Cayetano should be ready for a lot of pain
• Cayetano’s old playbook returns: No WiFi, no air-conditioning for Senate minority
• ‘Wow, tapang’: How the Senate chaos fired up these Filipinos to create viral songs

Nasaan na ba ang hinahon natin sa mga panahong ito? Habang mas nagiging malinaw sa atin ang mga plano ng mga nása kapangyarihan at nais na manatili rito, saan na nga ba táyo dadalhin ng ating hinahon (o kawalan nitó) sa hinaharap? 

Mainam bang manatili na lang táyong mabini sa di-proaktibong pakahulugan nito? Manahimik at hayaan na lang magtuloy ang mga pangwawalang-hiya? O pakilusin na dapat natin ang salita? Gamitin ang espasyo ng katahimikan para dinggin ang mga pinatatahimik at harapin ang mga nag-iingay at nanloloko lang? May oras pa táyo. Pero tumatakbo na ito noon pa. Walang mahiwagang salaming magsasabi sa atin na kumilos na. Anihin na natin at tamasahin ang biyaya ng bini’t hinahon ngayon na. – Rappler.com

Sumusulat si Roy Rene S. Cagalingan ng mga tula at sanaysay. Kasapi siya ng Linangan sa Imahen, Retorika, at Anyo (LIRA) at Unyon ng mga Manunulat sa Pilipinas (UMPIL). Isa siyang manggagawang pangkultura.