[EDITORIAL] Can’t get over it: si Escudero talaga ang mukha ng Senado sa impeachment?

Ngayong may malinaw nang mga petsa ang pagsisimula ng impeachment trial ni Vice President Sara Duterte, aligaga, balisa, ang maraming umaasa ng patas, maayos, at makatarungang paglilitis. Higit pa diyan, dapat itong magbigay sa taumbayan ng unprecedented insight sa karakter ng pinakapopular na kandidato sa 2028. 

Kung sakto sa hulog, bakit hindi? Pero kung wala sa hulog — dapat magkaalaman na ngayong trial. Hindi lang ito political teleserye — dapat ang tanong natin bilang botante: karapat-dapat ba siyang maging bise presidente, at sa hinaharap, presidente? 

Pero bago ‘yan, may isang malaking tanong pa ngayon: Given ang composition nito, mapaninindigan ba ng Senado ang katungkulan na litisin ang Bise? 

Sabi nga ni dating Senate president Frank Drilon — never has a Senate since 1986 been more unstable than today.

Sabi naman ni Arjan Aguirre sa isang opinion piece sa Rappler: kapag pinersonalize ang Senate presidency to this degree (tulad ng ginawa ni Cayetano) — kapag hindi ito maihiwalay sa survival ng mga humahawak nito, ang institusyon mismo ang nasisira sa paraang tagos sa ibang liderato.

Sabi rin ni Aguirre, sa Senate circa 2026, dinadaan sa boycott, Facebook Lives, at pekeng proceedings ang power moves. Que horror!

Imbes na lehitimong paggamit ng legislative authority, mistula na itong tower defense game. (For those who don’t get the term, ’yan yung strategy game kung saan ang pakay ay pigilan ang dagsa ng kalaban na makarating sa base o tore.)

Sabi nga ni Drilon, maaaring maging maya’t-maya ang struggle para sa kontrol ng Senado dahil ito ang institusyong kritikal sa impeachment, na magiging kritikal naman sa kontrol ng bansa sa 2028.

Kaya’t umaapela siya sa mga senador na unahin ang national interest at hindi ang pansariling ganansiya. Well, we can dream, right?

Which brings us to the quality of our senators — kaya ba nilang unahin ang bayan kaysa sarili? Halimbawa, tinanong si Pia Cayetano kung sumusuporta na siya kay Senate President Win Gatchalian, ang iritadong sagot ay “Common sense ‘yan, they have 13.” Parang hindi lehitimo ang tanong, at parang hindi niya kapatid ang kapit-tuko sa kapangyarihan. 

Pero tila lagpas sa common sense ng Senadora na matuwa dahil may konting istabilidad na sa Senado at makakapagtrabaho na siya. Lagpas din sa common sense niya na magpakita ng united front upang maibalik naman kahit konti ang respeto ng tao.

To be fair, hindi siya nagpakaplastik for once. Imbes na magbigay ng pinagpraktisang sagot na lip service sa demokrasya — she spouts it like it is in the minority — it’s a numbers game, and the moment they see a chink in the armor of the majority — umasa tayo sa panibagong coup.

Pero let’s face it, it’s not Alan Peter who keeps us up at night nowadays, it’s Senator Chiz Escudero.

Speaking of common sense, how can Chiz effectively navigate the impeachment trial with credibility, given how he handled the previous impeachment trial? Sabi nga he is the “most imperfect choice”  to preside over the impeachment trial. 

Nagtataka ba kayo na napapayag ang mayorya (with all its progressive senators) na maging presiding officer ang dating SP na singlehandedly nagpaantala sa impeachment noong 2025?

Obvious ba na may horse-trading na naganap? We won’t begrudge the senators their pragmatic choices — basta ba matitiyak nilang Chiz will work for the greater good. Teka, alam ba ni Chiz ang kahulugan ng “the greater good” na hiwalay sa kahulugan ng “the good of Chiz?”

Will this decision go down in history as the brilliant move that broke the impasse, or the naive move that will cost them victory in the end? 

Naghahabol ba si Chiz ng redemption ng kanyang pangalan (at kaluluwa) matapos ang ginawa niya sa “forthwith” comedy of 2025, o nakatitig siya sa pagpapatibay ng poder sa ilalim ng isang Sara presidency?

Sorry we still can’t get over it: si Chiz Escudero talaga ang magiging mukha ng Senado sa panahon ng paglilitis? 

Pero senators, don’t make the mistake of miscalculating the Filipino people. Baka hindi ‘nyo napapansin, baliktad na ang mundo, mas mababa ang ratings ng Senado sa House — institutional credibility ang nakasalang sa trial na ito. 

Di lang si Sara Duterte ang huhusgahan kundi mismo kayong nasa Senado. 

Get the barf bags ready. Sorry, we mean the popcorn. 😉 – Rappler.com